DEPARTAMENTO DE ORIENTACIÓN
C.E.I.P NAZARET
As discapacidades motoras abranguen un grupo de alteracións do aparello motor (ósos, articulacións, músculos ou sistema nervioso implicado na regulación da mobilidade), debidas a diferentes causas, en graos e formas variables e que de maneira transitoria ou permanente supoñen algunha limitación ou imposibilidade funcional para unha persoa.
Xunto coas disfuncións propias do aparello motor, poden presentarse algúns trastornos asociados. Os máis habituais son os seguintes: Alteracións sensoriais (visión, audición).
Trastornos neurolóxicos.
Dificultades na percepción.
Alteracións da linguaxe.
Dificultades cognitivas e de atención.
Alteracións emocionais e socioafectivas.
A etapa escolar destes rapaces e rapazas iníciase a partir dunha avaliación psicopedagóxica por parte do Departamento de Orientación dos centros educativos, valoración que resulta imprescindible para poder tomar decisións e ofrecer propostas de intervención.
Dentro dun enfoque de traballo interdisciplinar, é necesario recadar toda a información útil e relevante dende un punto de vista educativo sobre o neno e a nena e o seu contorno, coas achegas da familia e dos profesionais que participan no seu proceso de desenvolvemento, tamén a información derivada dos ámbitos clínico-neurolóxico, motriz-corporal, cognitivo, comunicativo, afectivo e socio-familiar; procurando que a focalización do estudo no ámbito motriz non supoña o descoido doutras dimensións da persoa.
A escolarización do alumnado con discapacidade motora ten que considerar, ademais das necesidades educativas persoais de cada alumno ou alumna, outras variables como son as características do centro escolar ou a dispoñibilidade de recursos específicos.
Centro ordinario: como norma xeral, será escolarizado nos centros educativos ordinarios, coas adaptacións, apoios e axustes pedagóxicos que cumpran, e nas mesmas condicións e prazos de admisión que o resto do alumnado.
Centro ordinario de escolarización preferente para alumnado con discapacidade motora: son centros que, polas súas características, equipamentos, recursos e servizos complementarios, permiten ofrecer unha atención educativa específica e axustada ás necesidades deste alumnado, polo que terá preferencia para ser escolarizado neles.
Centro específico de educación especial: ten como finalidade principal a escolarización do alumnado que, pola gravidade, tipoloxía ou permanencia das súas necesidades educativas, requira recursos excepcionais e atencións especializadas que non poidan proporcionarse en contextos ordinarios.
Aula específica de educación especial nun centro ordinario: son aulas situadas en centros ordinarios que a Administración educativa pode determinar, tendo en conta, entre outros criterios, a oferta educativa existente na zona.
Atención educativa hospitalaria e domiciliaria como medidas para darlle continuidade ao proceso formativo do alumnado en escolarización obrigatoria que, por prescrición facultativa, non poida asistir de xeito habitual e continuo ao seu centro escolar.
VISITA A WEB DO PROXECTO EDIA
VISITA A WEB DO
PROXECTO EDIA
VISITA A WEB DO
PROXECTO EDIA
VISITA A WEB DO
PROXECTO EDIA